Sümük iliyi transplantasiya mərkəzi ildə 150-yə qədər əməliyyat həyata keçirməyi hədəfləyir

Yeni sümük iliyi transplantasiya mərkəzi ildə 150-yə qədər əməliyyat həyata keçirməyi hədəfləyir. Bunu  TƏBİB-in içraçı direktoru Vüqar Qurbanov bildirib.

"Transplantasiya sahəsində beynəlxalq təcrübəyə əsasən, il ərzində 100-dən az sümük iliyi köçürülməsi həyata keçirən tibb müəssisələrinin nəticələri uzunmüddətli dövrdə kifayət qədər effektiv hesab edilmir. Buna görə də, Azərbaycanda yeni yaradılan sümük iliyi transplantasiya mərkəzi qısa müddətdə yüksək nəticələr əldə etmək məqsədi ilə illik əməliyyat sayını minimum 150-yə çatdırmağı planlaşdırır", İcraçı direktor vurğulayıb.

Aytac Zeynalova

Mərkəzin həkim heyətinin bildirdiyinə görə, bu hədəfə çatmaq üçün həm təcrübəli mütəxəssislərin hazırlanması, həm də 22 palatalıq xüsusi şöbənin yüksək yüklənməni qarşılayacaq səviyyədətəşkili nəzərdə tutulur. Transplantasiya olunan xəstələrin stasionar qalma müddəti sabit olmadığından, bəzi pasiyentlərin 3 ayadək, bəzilərinin isə 6 ayadək xəstəxanada qalması tələb oluna bilər. Bu səbəbdən palata potensialının gücləndirilməsi xüsusi əhəmiyyət daşıyır.

Birinci mərhələdə uşaqlar üstünlük təşkil edəcək

Mərkəz rəhbərliyi bildirir ki, ölkədə sümük iliyi transplantasiyasına ehtiyacı olan uşaqların sayı kifayət qədər yüksəkdir. Buna görə də xidmətə başlanılan ilk mərhələdə növbədə olan uşaq pasiyentlərin müalicəsi prioritet olacaq.

Bununla yanaşı, şöbədə böyüklərin də müalicəsi nəzərdə tutulur. Xüsusilə onkoloji xəstəliklər, qan xəstəlikləri və digər ağır diaqnozlar üzrə sümük iliyi transplantasiyasına ehtiyacı olan vətəndaşların da müraciətləri qəbul ediləcək.

Mərkəzdən verilən məlumata görə, hazırda əməliyyatların planlaşdırılması prosesi aparılır və növbəti ilin əvvəlindən tam gücü ilə fəaliyyətə başlamaq gözlənilir.