Xaricdə təhsil alan azərbaycanlı həkimlərin Azərbaycanda işləməsi çətinləşib - Deputat/Video

Yeni rezidentura proqramının tətbiqi xaricdə təhsil alan azərbaycanlı həkimlərin ölkədə fəaliyyətə başlamasını ciddi şəkildə çətinləşdirib. Bunu deputat Rəşad Mahmudov Milli Məclisin plenar iclasında çıxışı zamanı deyib.

Onun sözlərinə görə, xüsusilə Rusiya və MDB ölkələrində tibbi təhsil və klinik ixtisaslaşma almış yüzlərlə həkim son aylarda ixtisaslarının Azərbaycanda tanınmaması ilə bağlı şikayət edir.

“Əsas problem xaricdə, xüsusilə MDB məkanında alınmış klinik ixtisasların ölkəmizdə tanınması mexanizminin faktiki dayanmasıdır. Bu, təkcə texniki məsələ deyil, həm insani hüquqlara, həm də ölkənin səhiyyə ehtiyaclarına təsir göstərir”, – deputat bildirib.

Mahmudov qeyd edib ki, həmin həkimlər yüksək səviyyəli klinikalarda təhsil alıb, çalışıblar və Azərbaycan dilini bilirlər. Onların adaptasiya, imtahan və regionlarda çalışma tələblərinə hazır olduqlarını vurğulayıb.

Deputat xatırladıb ki, Azərbaycan Lissabon Konvensiyasının iştirakçısıdır və sənədə əsasən, diplomların tanınmaması yalnız “əhəmiyyətli fərq” sübuta yetirilərsə mümkündür. 2023-cü ildən qüvvədə olan “Tanınma qaydaları” da imtahan və adaptasiya mərhələlərini açıq şəkildə müəyyən edir.

“Məsələ nə siyasi, nə emosionaldır. Tam şəffaf, daimi və hüquqi mexanizmlə bu problemi həll etmək mümkündür. Azərbaycanda, xüsusilə regionlarda kadr çatışmazlığı yaşandığı bir vaxtda hazır resursdan istifadə edə bilmirik”, – Mahmudov vurğulayıb.

Deputat xaricdə klinik ixtisas almış azərbaycanlı həkimlərin bilik və bacarıqlarının qiymətləndirilməsi üçün daimi adaptasiya imtahanlarının və tanınma mexanizminin yaradılmasına çağırıb.

Spiker Sahibə Qafarova deputata cavab olaraq bildirib ki, Elm və Təhsil Nazirliyində bu məsələ ilə bağlı məşğul olan qurum var. Buna görə də bu mövzu ilə bağlı Milli Məclisdə diskusiya qurmağa ehtiyac yoxdur. 

Gülnar Nazimqızı