Sumqayıtda 72 yaşlı qadın ona vurulan iynədən sonra ölüb/Yenilənib

Sumqayıtda 1953-cü il təvəllüdlü qadın həkim təyinatı əsasında vurulan “Aktoseril” inyeksiyasından sonra anafilaktik şok keçirərək ölüb. Bu barədə TƏBİB noyabrın 26-da sorğuya cavab olaraq bildirib. 

Qurumun bildirdiyinə görə, qadın yüksək təzyiq səbəbilə Sumqayıt Tibb Mərkəzinin 3 nömrəli Ailə Sağlamlıq Mərkəzinə müraciət edib və ona inyeksiya tətbiq edilən zaman vəziyyəti qəfil pisləşib. Tibb personalı protokollara uyğun təcili tibbi yardım tədbirləri həyata keçirsə də, pasiyentin həyatını xilas etmək mümkün olmayıb. Meyit baxış üçün məhkəmə-tibbi ekspertizaya göndərilib.

TƏBİB əlavə edib ki, prosedur tibbi təyinat, elektron qeydiyyat və preparatın seriya-nömrə yoxlanışı əsasında sertifikatlı tibb bacısı tərəfindən icra olunub. İnyeksiya otağı anafilaktik şok halı üçün tələb olunan dərman və avadanlıqlarla tam təchiz edilib və bütün müdaxilələr “Təcili Yardım Protokolları”na uyğun aparılıb.

12:06

Noyabrın 25-də Sumqayıtın 45-ci məhəlləsində yerləşən 3 saylı Ailə Sağlamlıq Klinikasında 72 yaşlı qadın iynənin təsirindən ölüb. Bu barədə yerli mətbuat məlumat yayıb.

Şəhər sakini, 1953-cü il təvəllüdlü Nigar Babaxanova, klinikada vurulan iynədən sonra vəfat edib. 

Faktla bağlı müvafiq orqanlar araşdırma aparır.