Naxçıvanda deputatların iclaslardan yayınmasına görə cəza sərtləşdirilir

Naxçıvan Muxtar Respublikasında deputat intizam qaydaları sərtləşdirilir. “Naxçıvan Muxtar Respublikası Ali Məclisinin Daxili Nizamnaməsi”nə dəyişiklik edən qanun layihəsinə əsasən, Ali Məclisin 5 iclasını üzrsüz səbəbdən buraxan deputatın mandatına xitam veriləcək.

Bu, əvvəlki qaydadan xeyli sərtdir. Mövcud qanunvericiliyə görə, deputat il ərzində 10 iclası və ya növbəti sessiyanın bütün iclaslarını üzrsüz səbəbdən buraxdıqda məsələ İntizam Komissiyasına göndərilir, araşdırma aparılır və yalnız rəy əsasında mandatın itirilməsi Ali Məclisin müzakirəsinə çıxarılır.

İntizam proseduruna əsasən, məsələ deputatın iştirakı ilə — bu mümkün olmadıqda isə iştiraksız — iclasda müzakirə edilir. Deputatlar yalnız mandatın itirilməsi üçün əsasların olub-olmadığını aydınlaşdırmaq və çıxış etmək hüququna malikdirlər. Mandatın alınması barədə qərar ən azı 23 səs topladıqda qəbul edilir.

Yeni dəyişiklik deputatların iclas intizamının gücləndirilməsi məqsədi daşıyır.