İran nömrələri ilə uşaqlara yazıb narkotik təklif edildiyi iddia olunur- DİN-dən açıqlama

Sosial şəbəkələrdə bir valideyn övladına İran nömrələri vasitəsilə yazılaraq narkotik maddə təklif edildiyini iddia edir. Bu barədə o,  facebook hesabında paylaşım edib.

Valideyn paylaşımında xüsusilə yeniyetmələri belə tələlərə düşməməyə çağırıb.

DİN-in Mətbuat Xidmətinin əməkdaşı Lumu İsrəfilli bildirib ki, sosial şəbəkələrdə narkotik vasitələr təklif edən səhifələr, əsasən, əksər hallarda xarici ölkələrdə yaradılaraq idarə edilir. Həmin şəxslər ölkə daxilində özləri üçün narkokuryerlər tapmaq məqsədilə narkotik vasitələrin onlayn satışını təşkil edirlər.

"Polislər tərəfindən ölkə daxilində narkotik vasitələr satan, narkotacirlərin şəbəkəsinə daxil olan narkokuryerlər müəyyən edilərək məsuliyyətə cəlb edilirlər. Ölkəmizdə xaricdəki narkotacirlərlə iş birliyinə girən şəxslər elə bilməsin ki, saxta profillər açaraq, onlayn yollarla narkotik vasitələrin satışını həyata keçirməklə məsuliyyətdən yayına biləcəklər. DİN-nin əməkdaşları tərəfindən həyata keçirilən əməliyyat-texniki tədbirlər nəticəsində ölkə daxilində narkokuryerlər və narkotik vasitə satan şəxslərin kimlikləri müəyyən olunaraq onlar barəsində tədbirlər görülür və bundan sonra da qətiyyətli mübarizə tədbirləri davam etdiriləcək",- məlumatda qeyd olunub.

DİN rəsmisi sosial şəbəkə istifadəçilərindən onlayn qaydada narkotik vasitə satışı ilə məşğul olan səhifələrlə rastlaşdıqları təqdirdə Daxili İşlər Nazirliyinin “102” qaynar xəttinə, eləcə də Daxili İşlər Nazirliyin sosial şəbəkələrdəki rəsmi səhifələrinə müraciət etmələrini xahiş edib.

"Aktiv sosial şəbəkə istifadəçilərindən xaricdən idarə edilməklə onlayn yolla narkotik satışı həyata keçirən səhifələr gördükdə həmin səhifələri şikayət etməklə onların fəaliyyətinin dayandırılmasına köməklik göstərmələrini xahiş edirik",- məlumatda qeyd olunub.

Aytac Zeynalova