İslam Rzayev külli miqdarda mənimsəmə və rüşvət ittihamları ilə həbs edilib - Video

Dövlət Təhlükəsizliyi Xidməti (DTX) tərəfindən keçirilmiş kompleks əməliyyat-istintaq tədbirləri nəticəsində məlum olub ki, Balakən Rayon İcra Hakimiyyətinin sabiq başçısı İslam Vahid oğlu Rzayev vəzifəsində işlədiyi dövrdə öz qulluq mövqeyindən istifadə edərək dövlət əmlakını mənimsəyib və çoxsaylı korrupsiya cinayətlərinə yol verib.

DTX-nin məlumatına görə, Rzayev dövlət büdcəsindən işsiz və aztəminatlı şəxslərə, rayon ərazisində təmir-tikinti və abadlıq işlərinə ayrılmış vəsaitləri mənimsəyib, onların təyinatı üzrə xərclənməsini təmin etməyib. Həmçinin, vəzifəli şəxslərdən və iş adamlarından rüşvət aldığı müəyyən olunub.

Faktla bağlı DTX-nin İstintaq Baş İdarəsində başlanmış cinayət işi üzrə Rzayev saxlanılıb və ona qarşı Azərbaycan Respublikası Cinayət Məcəlləsinin 179.3.2-ci maddəsi (külli miqdarda mənimsəmə) və 311.3.2-ci maddəsi (təkrar rüşvət alma) üzrə ittiham irəli sürülüb. Məhkəmənin qərarı ilə sabiq icra başçısının barəsində həbs qətimkan tədbiri seçilib.

Hazırda cinayət işi üzrə istintaq-əməliyyat tədbirləri davam etdirilir.