Tovuzda erkən nikah cəhdi polis tərəfindən dayandırılıb

Tovuz rayonunda 14 yaşlı qızın toy mərasiminin keçirilməsinin qarşısı alınıb. Daxili İşlər Nazirliyinin (DİN) məlumatına görə, hadisə rayonun Yuxarı Öysüzlü kəndində qeydə alınıb.

Polisə 2011-ci il təvəllüdlü, yəni nikah yaşına çatmayan qız üçün toy mərasimi hazırlandığı barədə məlumat daxil olub. Daxil olan məlumat əsasında polis əməkdaşları dərhal müdaxilə edərək mərasimi dayandırıblar.

Araşdırma çərçivəsində tərəflərin valideynləri polis orqanına dəvət edilib, onlarla profilaktik söhbətlər aparılıb, qanunvericiliyin tələbləri izah olunub. Nəticədə valideynlər barəsində inzibati protokollar tərtib edilərək məhkəməyə göndərilib.

Məhkəmənin qərarına əsasən, valideynlərdən biri 1 ay müddətinə inzibati qaydada həbs edilib.

Azərbaycan qanunvericiliyinə görə nikah üçün minimum yaş həddi 18-dir və bu tələbin pozulması inzibati və cinayət məsuliyyəti yarada bilər. Hüquq-mühafizə orqanları erkən nikah halları ilə bağlı nəzarət tədbirlərinin davam etdiriləcəyini bildirir.

Gülnar