Elektron siqaretlərə nəzarət və qadağalar gücləndirilməlidir - Deputatlardan təklif

Azərbaycanda elektron siqaretlərin yayılması və ictimai məkanlarda siqaret çəkməyə nəzarətin zəifliyi ilə bağlı narahatlıqlar artır. Deputatlar bildirirlər ki, mövcud vəziyyət xüsusilə gənclər və uşaqlar üçün ciddi sağlamlıq riskləri yaradır.

Deputat Aydın Hüseynovun sözlərinə görə, əsas məsuliyyət Səhiyyə Nazirliyinin üzərinə düşür. O vurğulayıb ki, elektron siqaretlərin mövcud xəstəliklərə göstərdiyi yan təsirlər ictimaiyyətə açıq şəkildə açıqlanmalıdır. Hüseynov həmçinin qadağa tətbiq ediləcəyi halda, satış və nəzarət mexanizmlərinin necə işləyəcəyinin əvvəlcədən müəyyənləşdirilməsinin vacibliyini qeyd edib.

Deputat Elşad Musayev isə problemə icra və nəzarət aspektindən yanaşıb. Onun sözlərinə görə, ölkə üzrə restoranlarda, kafe və əyləncə məkanlarında, hətta oyun məkanlarında belə siqaret çəkilir.

Musayev bildirib ki, məhkəmə qərarlarının icrasında ciddi problemlər var və məsul qurumlar açıq şəkildə göstərilmədikcə vəziyyət dəyişməyəcək. O, mövcud şəraitdə uşaqların və yeniyetmələrin siqaret çəkilən mühitlərlə üz-üzə qaldığını vurğulayıb.

Deputat Göydəniz Qəhrəmanov isə diqqəti xüsusilə iaşə obyektlərinə yönəldib. Onun fikrincə, kafe və restoranlarda siqaret istifadəsinə dair qaydalar faktiki olaraq icra edilmir. Qəhrəmanov qeyd edib ki, gənclər arasında elektron siqaretdən istifadə sürətlə artır, lakin bu vərdişin 5–10 il sonra hansı sağlamlıq fəsadlarına yol açacağı hələ məlum deyil. O, elektron siqaretlər üzrə yaş məhdudiyyətlərinə nəzarətin ciddi şəkildə gücləndirilməsini təklif edib.

Gülnar Nazimqızı