Deputat ödənişli parklanma yerlərində avtomobillərin sığortalanmasını zəruri hesab edir

Son illərdə avtomobil sayının artması şəhəriçi nəqliyyatın idarə olunması və küçə parklanmasının tənzimlənməsini zəruri edir, lakin ödənişli parklanma yerlərində avtomobillərin fiziki təhlükəsizliyi və sığortalanması məsələsi hüquqi boşluq olaraq qalır. Bunu deputat Vasif Qafarov dekabrın 26-da parlamentin iclasında çıxışı zamanı deyib. 

Qafarov qeyd edib ki, Mülki Məcəllə və “İstehlakçıların hüquqlarının müdafiəsi haqqında” qanun xidmət göstərən tərəfin məsuliyyətini və xidmətin təhlükəsizliyini tələb edir. O əlavə edib ki, ödənişli parklanma xidmətində sığorta mexanizminin tətbiqi həm hüquqi, həm də sosial baxımdan zəruridir, beynəlxalq təcrübə isə bunun effektivliyini təsdiqləyir.

Deputat vurğulayıb ki, sığortanın olmaması vətəndaşların hüquqlarının pozulmasına və parklanma xidmətinə etimadın zəifləməsinə səbəb olur. Park yerində avtomobillərə digər şəxslər və ya təbiət hadisələri tərəfindən dəyən zərərlər sürücülərin üzərinə düşür.

Qafarov qanunvericilikdə dəyişikliklər etməyi, ödənişli parklanma xidmətlərində avtomobillərin təhlükəsizliyinə dair məsuliyyətin aydın şəkildə müəyyənləşdirilməsini və park haqqına minimal sığorta komponentinin daxil edilməsini təklif edib.

Gülnar Nazimqızı