MÜTDA direktor vəzifəsi üzrə elektron ərizə mərhələsinin nəticələrini açıqlayıb

Məktəbəqədər və Ümümtəhsil Dövlət Agentliyi 2025-ci ilin 30 oktyabr – 11 noyabr tarixlərində keçirilmiş direktor vəzifəsi üzrə elektron ərizə qəbulu mərhələsinin nəticələrini açıqlayıb.

Ərizə mərhələsində 3036 namizədin müraciəti qeydə alınıb. Müsabiqə şərtlərinə uyğun olaraq, ali təhsil, pedaqoji staj, sertifikatlaşdırma nəticələri, müəllimlərin işə qəbulu müsabiqəsi və diaqnostik qiymətləndirmə göstəricilərinə əsasən 941 namizədin ərizəsi müsbət qiymətləndirilib. Həmin şəxslərin məlumatları şəxsi səhifələrinə göndərilib.

Müsahibə mərhələsində namizədlərin liderlik və strateji idarəetmə bacarıqları, pedaqoji və metodiki qabiliyyətləri, ünsiyyət və qərarvermə bacarıqları, eləcə də rəqəmsal və sosial kompetensiyaları qiymətləndiriləcək.

Bundan əlavə, ali təhsili və pedaqoji stajı tələblərə uyğun, lakin əvvəlki qiymətləndirmə nəticələri olmayan 627 namizəd üçün 24 yanvar 2026-cı il tarixində ixtisas üzrə imtahan keçiriləcək. İmtahanda iştirakçılara fənn üzrə 50, metodika və təlim strategiyaları üzrə isə 10 test tapşırığı təqdim olunacaq.