Azərbaycan Yazıçılar Birliyi üzvlük qəbulunu dayandırıb

Azərbaycan Yazıçılar Birliyi (AYB) üzvlük qəbulunu 2027-ci ildə keçiriləcək qurultaya qədər dayandırıb. Bu barədə Birliyin mətbuat katibi Xəyal Rza Modern.az-a açıqlamasında bildirib.

O, qeyd edib ki, hazırda əvvəlki müraciətlər nəzərdən keçirilir, bəzi namizədlərə imtina, bəzilərinə isə qəbul verilib. Qəbulun dayandırılmasının səbəbi müraciətlərin çoxluğu ilə bağlıdır.

Xəyal Rza əlavə edib ki, üzvlük haqqını ödəməyənlər Birlikdən kənarlaşdırıla bilər, lakin təşkilat hər zaman humanist mövqe nümayiş etdirib. Hazırda AYB-də 2,500-dən çox üzv var və hər bir üzv üçün illik üzvlük haqqı 15 manat təşkil edir.

O, qeyd edib ki, 2020-ci ilə qədərki borclar silinib, lakin sonrakı illərdə ödəməyənlər var və bu il 1 fevralda onlar barəsində qəti qərar veriləcək.

Xəyal Rza həmçinin vəfat etmiş üzvlərlə bağlı iradlara cavab verib: mərhum üzvlərin siyahıda qalması texniki səbəblərlə əlaqədardır və ailə üzvlərinin məlumat verməsi tələb olunur.

Birliyin üzvlük haqqının artırılması planı yoxdur.