Məktəbdən yayınan 133 uşağın dərsə davamiyyəti təmin edilib - Agentlik sədri

2025-ci ildə 133 uşağın dərsə davamiyyəti bərpa olunub. Bunu Sosial Xidmətlər Agentliyinin sədri Vüqar Behbudov bildirib. 

O vurğulayıb ki, 2025-ci il ərzində Agentliyin sosial işçiləri tərəfindən 414-ü yeni olmaqla, ümumilikdə 685 məktəbə səfər edilib və əməkdaşlıq edilən məktəblərin sayı 1140-a çatdırılıb.

Məktəbdə 1392 uşaqla ilkin qiymətləndirmə aparılıb, vəziyyəti daha riskli hesab olunan 320 uşağın ailələrinə səfər edilərək təfsilatlı qiymətləndirmə həyata keçirilib.

Nəticədə uşaqların ailələri ilə sosial yönümlü iş aparılıb, 133 uşağın dərsə davamiyyəti bərpa olunub.

Baxımsız və kimsəsiz uşaqlar Uşaq evi sosial xidmət müəssisəsinə yerləşdirilib, bəzi uşaqlar fərdi təhsilə yönləndirilib, digərləri isə loqoped xidməti ilə müsbət nəticə əldə edib.

Təhsildə sosial iş çərçivəsində 142 ailəyə fərdi inkişaf planı tərtib olunub.

Aytac Zeynaova