Ötən il 54,5 min şəxsə əlillik təyin edilib

2025-ci ildə Dövlət Tibbi-Sosial Ekspertiza və Reabilitasiya Agentliyi tərəfindən 54,5 min şəxsə əlillik təyin edilib, onlardan 25,3 min nəfərə ilkin, 29,2 min nəfərə isə təkrar əlillik təyin olunub. 
Bunu Agentliyin İdarə Heyətinin sədri Ramin Rzayev əlilliyin qiymətləndirilməsi və əlilliyi olan şəxslərin reabilitasiya xidmətləri ilə təminatı sahəsiində ötən ilin yekunlarına dair tədbirində deyib.

 O qeyd edib ki, son bir ildə Agentliyin reabilitasiya müəssisələrində əlilliyi olan 142 min şəxsə reabilitasiya xidmətləri göstərilib, onlardan 78,6 min nəfər ambulator, 33,2 min nəfər stasionar və icma əsaslı reabilitasiya xidmətləri ilə təmin edilib. 

"Bu kateqoriyadan olan 13,7 min şəxsə 212 min reabilitasiya vasitəsi verilib. 2024-cü ilə nisbətən 2025-ci ildə reabilitasiya xidməti göstərilənlərin sayı 15 faiz, reabilitasiya vasitələri ilə təmin edilənlərin sayı 12,5 faiz, təqdim edilən reabilitasiya vasitələrinin sayı 2,2 dəfə artıb",- o vurğulayıb.

Aytac Zeynalova