DİN: Sosial şəbəkələrdə “xaricdə iş və təhsil” elanları ilə insan alveri riski artır

Daxili İşlər Nazirliyi (DİN) vətəndaşları xaricdə iş və təhsil adı altında yayılan saxta onlayn elanlara qarşı ehtiyatlı olmağa çağırıb.

Nazirlik bildirir ki, son dövrlər sosial şəbəkələrdə yüksək maaş, sərfəli şərtlər və sürətli sənədləşmə vədləri ilə yayılan təkliflər insan alveri riski yaradır.

DİN-in Mətbuat Xidmətinin məlumatına görə, bu cür elanlara inanaraq xarici ölkələrə səfər edən bəzi vətəndaşların sənədləri əllərindən alınır, onlar məcburi əməyə və cinsi istismara məruz qalır və nəticədə insan alverinin qurbanına çevrilirlər.

Nazirlik risklərin azaldılması üçün aşağıdakı profilaktik addımları tövsiyə edir:

“152” Qaynar Xətti ilə (DİN-in İnsan Alverinə qarşı Mübarizə Baş İdarəsi) əlaqə saxlayaraq ödənişsiz və konfidensial məsləhət almaq;

Getmək istənilən ölkədə Azərbaycanın akkreditə olunmuş diplomatik nümayəndəliyi və ya Konsulluğu ilə əlaqə yaradıb elanın həqiqiliyini dəqiqləşdirmək;

İş və ya təhsil təklifi verən şirkət və ya şəxsin lisenziyasını tələb etmək;

Əmək müqaviləsinin surətini öncədən almaq.

DİN əlavə edir ki, ölkə hüdudlarını tərk etdikdən sonra da şəxsiyyəti təsdiq edən sənədlər heç kimə verilməməli, əmək fəaliyyəti yalnız rəsmi müqavilə əsasında aparılmalı və hər hansı qanunsuzluq halında dərhal yerli polisə, eləcə də Azərbaycanın diplomatik nümayəndəliyinə və ya Konsulluğuna müraciət edilməlidir.

Nazirlik vurğulayır ki, məlumatlılıq insan alverinə qarşı ən effektiv qoruyucu mexanizmlərdən biridir.

Aytac