Xəstəxana sağ olan babasının yerinə meyit verdi - İddia

İnsult diaqnozu ilə Efendiyev adına xəstəxanaya yerləşdirilən bir şəxsin ailəsinə ölüm xəbəri verilib, lakin sonradan həmin şəxsin sağ olduğu üzə çıxıb. Bu barədə sosial şəbəkədə Taleh Qasımlı paylaşım edib. 

Paylaşımda bildirir ki, hadisə onun çalışdığı müəssisədə çalışan mühəndisin babası ilə bağlıdır.

İddiaya əsasən, xəstə təxminən bir həftə xəstəxanada müalicə aldıqdan sonra ailəyə zəng olunaraq ölüm xəbəri çatdırılıb və meyitin götürülməsi istənilib. Ailə dəfn hazırlıqlarına başlayıb və xəstəxanadan təqdim edilən meyiti apararaq yuma mərasiminə hazırlıq görüb.

Məlumata görə, mərhumun oğlu meyitin yuyulması zamanı içəri daxil olub və meyitin atasına aid olmadığını aşkar edib. Sonradan aydın olub ki, insult keçirən şəxs əslində sağdır və onun əvəzinə ailəyə başqa bir şəxsin cəsədi təqdim edilib.

Qasımlı iddia edir ki, əgər ailə üzvü son anda meyiti tanımasaydı, başqa bir insan dəfn edilə bilərdi, daha sonra isə xəstəxanadan ailəyə “xəstənin sağaldığı” barədə məlumat verilə bilərdi.

Hazırda məsələ ilə bağlı rəsmi qurumların mövqeyi açıqlanmayıb.

Aytac