Qeyri-filiz yataqların istismarı ilə bağlı yeni qaydalar hazırlanacaq

Azərbaycanda qeyri-filiz faydalı qazıntı yataqlarının istismarı ilə məşğul olan yer təki istifadəçilərin fəaliyyətinin sağlamlaşdırılması tədbirlərinə dair yeni qaydalar hazırlanacaq.

Bu barədə Dövlət Mineral Xammal Ehtiyatlarından İstifadə Agentliyi İdarə Heyətinin sədri Samir İdayətov Milli Məclisin Təbii ehtiyatlar, energetika və ekologiya komitəsinin iclasında bildirib.

Onun sözlərinə görə, “Yerin təki haqqında” qanuna təklif edilən dəyişikliklər çərçivəsində yer təki istifadəçilərinin fəaliyyətinin sağlamlaşdırılması tədbirlərinə dair qaydalar müəyyən ediləcək. Layihədə istismardan sonrakı mərhələdə rekultivasiya işlərinin aparılması və dağ-mədən fəaliyyəti nəticəsində yaranan istehsalat tullantılarından istifadə qaydaları da əksini tapıb.

Agentlik rəhbəri qeyd edib ki, dağ-mədən tullantılarının idarə olunması üzrə vahid qaydaların formalaşdırılması zəruridir. Onun sözlərinə görə, faydalı qazıntıların hasilatı zamanı hər il ölkə üzrə yüz minlərlə ton istehsal və texnogen tullantı yaranır. Bu tullantıların böyük hissəsi sement istehsalında xammal kimi, bir qismi isə tikinti və infrastruktur layihələrində təkrar istifadə olunur.

Hazırlanacaq qaydaların əsas məqsədi tullantıların istifadəsini tənzimləmək, onların uçotu və hesabatlılığı üzrə mexanizmlərin tam tətbiqini təmin etməkdir.

Gülnar Nazimqızı