DSMF 1 000 manat ödənişlə bağlı yayılan məlumatın saxta olduğunu bildirib

1932–2017-ci illərdə doğulmuş vətəndaşlara 1 000 manat ödəniş ediləcəyi barədə sosial şəbəkələrdə yayılan məlumatlar tamamilə yalandır.

Bu barədə Dövlət Sosial Müdafiə Fondunun İctimaiyyətlə əlaqələr departamentinin müdiri Rəşad Mehdili Facebook hesabında bildirib.

O qeyd edib ki, yayılan video və məlumatlar vətəndaşları aldatmaq məqsədi daşıyır. Bildirilir ki, paylaşımda istifadəçilər “rəsmi siyahı” ilə tanış olmaq adı ilə linkə yönləndirilir və bu yolla onların bank kartı məlumatlarını ələ keçirmək cəhdi edilə bilər.

Fond vətəndaşları saxta məlumatlara aldanmamağa və göstərilən linklərə daxil olmamağa çağırıb.