Sumqayıt və Qazax kolleclərinə yeni direktor müavinləri təyin edilib

Elm və Ali Təhsil üzrə Dövlət Agentliyinin əmrləri ilə Zülfiyyə Hüseynova Sumqayıt Musiqi Kollecinə tədris işləri üzrə direktor müavini, Turanə Məmmədova isə Qazax Dövlət Sosial-İqtisadi Kollecinə tərbiyə işləri üzrə direktor müavini vəzifəsinə təyin olunublar.

Zülfiyyə Hüseynova Azərbaycan Milli Konservatoriyasında musiqişünaslıq ixtisası üzrə bakalavr, magistr və doktorantura təhsili alıb. O, Şuşa Musiqi Kollecində müəllim, Azərbaycan Milli Konservatoriyasında isə müxtəlif vəzifələrdə çalışıb, həmçinin respublika və beynəlxalq konfranslarda iştirak edib, elmi məqalələr nəşr etdirib.

Turanə Məmmədova bakalavr təhsilini “Tarix və ictimaiyyət”, magistratura təhsilini “Təhsilin pedaqogikası və metodikası” ixtisası üzrə alıb. Daha sonra ADA Universitetində “Təlim və tədrisin təşkili və metodikası” üzrə təhsilini davam etdirib. Son təyinatadək Şəmkir Rayon İcra Hakimiyyətində məsləhətçi vəzifəsində çalışıb.