"İdrak" liseyindəki müəllim onu güllələyən şagirdi bağışlayıb

“İdrak Liseyi”də müəllimə qarşı odlu silahla ağır xəsarət yetirməkdə ittiham olunan şagirdlə bağlı cinayət işi üzrə tərəflər arasında barışıq əldə olunub.

Qafqazinfo-nun məlumatına görə, zərərçəkmiş müəllim şagirdini bağışlayıb və barışığı təsdiq edən sənəd istintaq orqanına təqdim edilib.

Hadisə bu ilin fevralında baş verib. İttihama əsasən, 10-cu sinif şagirdi atasına məxsus ov tüfəngi ilə məktəbə gələrək 29 yaşlı riyaziyyat müəllimini güllələyib.

İş üzrə aparılan psixoloji ekspertizanın nəticələrinə görə, şagirddə “anlaqlılığı istisna etməyən psixi pozuntu” aşkar edilib. Rəydə qeyd olunur ki, onun davranışlarını tam idarə etmə qabiliyyəti mövcuddur və bu səbəbdən cinayət məsuliyyətindən azad edilmir, lakin vəziyyət cəza təyini zamanı yüngülləşdirici amil kimi nəzərə alına bilər.

Prokurorluq yekun ittiham aktını təsdiqlədikdən sonra iş məhkəməyə göndəriləcək.

Şagird Cinayət Məcəlləsinin “qəsdən adam öldürməyə cəhd” maddəsi ilə ittiham olunur. Təqsiri sübuta yetirilərsə, onun yetkinlik yaşına çatmaması nəzərə alınmaqla 10 ilədək azadlıqdan məhrumetmə cəzası nəzərdə tutulur.