Vüqar Bayramov: Təəssüf ki, iri sahibkarlar arasında qadınlar yoxdur

Şəhərsalma siyasətində inklüzivlik yalnız ümumi əlçatanlıq məsələsi kimi deyil, həm də gender prizmasından qiymətləndirilməlidir. Bunu deputat Vüqar Bayramov "Memarlıq və Şəhərsalma ili" çərçivəsində "Qadın iştirakçılığının təbliği" mövzusunda çıxışı   zamanı səsləndirib.

Onun sözlərinə görə, şəhərlərin, binaların, yolların və digər infrastrukturun layihələndirilməsi zamanı qadınlar və uşaqlarla bağlı meyarların nəzərə alınması vacibdir və bu yanaşma qanunvericilikdə də əksini tapmalıdır.

“İnklüzivlik təkcə xidmətlərə, infrastruktura və iş yerlərinə çıxışla məhdudlaşmır. Bu, eyni zamanda gender məsələsidir. Çünki burada qadınların və uşaqların xidmətlərə, iş yerlərinə çıxışının təmin olunmasından söhbət gedir”, -  Bayramov bildirib.

Deputat qeyd edib ki, beynəlxalq praktikada da şəhərsalmada qadın amilinə xüsusi diqqət yetirilir.

 Onun sözlərinə görə, BMT-nin Layihə Xidmətləri Ofisi bu istiqamətdə inklüziv yanaşmanın təşviqini dəstəkləyir, bəzi ölkələrdə isə “Cities for Women” yanaşması tətbiq olunur.

“Bu yanaşmada dizayn, xidmətlərə əlçatanlıq və şəhər mühitində qadınların maraqlarını nəzərə alan indikatorlardan istifadə ön plana çıxır. Şəhərsalmada dizayn qadınlar və uşaqlar üçün xidmətlərin əlçatanlığını artırmalı, eyni zamanda qadın sahibkarlığını stimullaşdırmalıdır”, - deputat deyib.

Bayramov vurğulayıb ki, Azərbaycan üçün bu məsələ xüsusi əhəmiyyət daşıyır. 

Deputat bildirib ki, qadın sahibkarlığının inkişafı iqtisadiyyatın dayanıqlılığı baxımından mühüm əhəmiyyət daşıyır.

“Hazırda mikro sahibkarlıqda qadınların payı 25 faiz, kiçik sahibkarlıqda 18 faiz, orta sahibkarlıqda isə təxminən 7 faizdir. Amma iri sahibkarlıqda qadın sahibkarlarımız yoxdur”, -  o qeyd edib.

Onun sözlərinə görə, sahibkarlıq miqyası böyüdükcə qadınların təmsilçiliyi azalır və bu, iqtisadiyyatda ciddi disbalansın göstəricisidir.

“Mikro sahibkarlıqdan iri sahibkarlığa doğru keçiddə qadın sahibkarların sayında kəskin azalma müşahidə olunur. Bu isə həm iqtisadiyyatın dayanıqlılığı, həm də inklüzivliyi baxımından çağırış yaradır”, - Bayramov əlavə edib.

Deputat hesab edir ki, dayanıqlı və balanslaşdırılmış iqtisadiyyat yalnız yaradılan dəyərdən bütün cəmiyyətin faydalanmasını deyil, həm də qadınların bu dəyərin yaradılmasında fəal iştirakını təmin etməlidir.

“İnklüziv iqtisadiyyat o iqtisadiyyatdır ki, orada qadınların və uşaqların həm yaradılan yeni dəyərdən faydalanması, həm də həmin dəyərin formalaşmasında iştirakı təmin olunur”, -  o bildirib.

Gülnar Nazimqızı