“AzerGold”un rüblük gəliri 102 mln manatı ötüb, ixrac gəlirləri 26% artıb

AzerGold 2026-cı ilin birinci rübündə qızıl və gümüş satışından ölkə iqtisadiyyatına 102,4 milyon manat vəsait cəlb edib. Bu barədə qurumun açıqladığı hesabatda qeyd olunur. 

Şirkətin məlumatına görə, hesabat dövründə 12 284 unsiya qızıl və 22 053 unsiya gümüş beynəlxalq və yerli bazarlarda satılıb. Ümumi gəlirin 91,1 milyon manatdan çoxu ixracın, 11,3 milyon manatdan çoxu isə daxili bazarda pərakəndə satışın payına düşüb.

Ötən ilin eyni dövrü ilə müqayisədə ixrac gəlirləri 26%, pərakəndə satış gəlirləri isə 102% artıb.

“AzerGold”un fəaliyyətə başladığı dövrdən bəri ümumi satış həcmi 572,3 min unsiya qızıl və 1,1 milyon unsiya gümüş təşkil edib. Bu satışlar nəticəsində ölkə iqtisadiyyatına ümumilikdə 2,04 milyard manat vəsait cəlb olunub.

Şirkət həmçinin dövlət büdcəsinə ümumilikdə 281 milyon manat ödəniş edib ki, bunun 242 milyon manatı vergi, 39 milyon manatı isə sosial ödənişlərin payına düşür.

Məlumata görə, 2025-ci ildə dolayı vergilər istisna olmaqla ən çox vergi ödəyən 100 şirkət arasında “AzerGold” 20-ci yerdə qərarlaşıb.

Şirkət fəaliyyət göstərdiyi Gəncə-Daşkəsən iqtisadi rayonunda məşğulluğun artırılmasına da töhfə verir. Hazırda qurum və onun törəmə müəssisələrində 1152 nəfər çalışır, podratçı təşkilatlar da daxil olmaqla ümumilikdə 2595 nəfər daimi işlə təmin olunub.

Şirkət bildirib ki, artan ixrac və maliyyə göstəriciləri fonunda sosial-iqtisadi layihələrin icrası davam etdirilir.

Aytac Zeynalova