Bakıda WUF13 başa çatır: forum şəhərlərin gələcəyi üçün yeni gündəlik formalaşdırdı - Fotolar

Bakıda keçirilən Ümumdünya Şəhərsalma Forumu - WUF13 bu gün bağlanış mərasimi ilə işini yekunlaşdırır.

Bir neçə gün ərzində Azərbaycan paytaxtı qlobal şəhərsalma gündəliyinin əsas müzakirə platformasına çevrildi.

Forum çərçivəsində ümumilikdə 53,5 min iştirakçı qeydə alınıb. Onların təxminən 50 mini tədbirlərə əyani, 3 mindən çoxu isə onlayn formatda qoşulub.

WUF13 müddətində 400-dən çox əsas tədbir təşkil edilib. 125 ölkədən 400-ə yaxın məruzəçi müxtəlif panel, sessiya və müzakirələrdə çıxış edərək urbanizasiya, mənzil təminatı, iqlim dəyişikliyi, dayanıqlı inkişaf və şəhərlərin gələcəyi ilə bağlı çağırışları müzakirə edib.

Forumun əsas yeniliklərindən biri Prezident İlham Əliyevin təşəbbüsü ilə WUF tarixində ilk dəfə keçirilən Liderlər Bəyanatı sessiyası olub.

Sessiyada 27 dövlət və hökumət başçısı, eləcə də beynəlxalq təşkilat rəhbərləri iştirak edərək qlobal şəhər gündəliyinə siyasi dəstək nümayiş etdiriblər.

Bağlanış mərasimində WUF13-ün nəticələri, əsas mesajları və gələcək şəhərsalma gündəliyinə dair tövsiyələr təqdim olunur. Bakı forumu urbanizasiya problemlərinin yalnız texniki deyil, həm də sosial, iqtisadi və siyasi yanaşma tələb etdiyini bir daha gündəmə gətirdi.

Aytac Zeynalova