Bank məlumatlarının oğurlanması kibercinayətlər arasında ilk yerdədir

Azərbaycanda kibercinayətlərlə mübarizənin hüquqi bazası həm milli qanunvericilik, həm də beynəlxalq öhdəliklər əsasında formalaşdırılıb. Bunu Azərbaycan Respublikası Baş Prokurorluğunun Cinayət təqibindən kənar icraatlar idarəsinin prokuroru Emin İsmayılzadə bildirib.

Onun sözlərinə görə, vətəndaşların hüquqları pozulduqda və ya qanun pozuntusu halları baş verdikdə operativ müdaxilə mexanizmlərinin tətbiqi vacibdir.

Emin İsmayılzadə qeyd edib ki, Azərbaycan 2019-cu ildə kibercinayətkarlıqla mübarizəyə dair Budapeşt Konvensiyasını ratifikasiya edib və bu sənəd üzv dövlətlər arasında vahid yanaşmanın formalaşdırılmasına, həmçinin beynəlxalq əməkdaşlığın gücləndirilməsinə xidmət edir.

" süni intellekt, kriptovalyutalar və digər yeni texnologiyaların sürətli inkişafı qanunvericiliyin daim yenilənməsini zəruri edir. Bu sahə çox dinamikdir. Bu gün qəbul edilən hüquqi mexanizmlər gələcəkdə yeni çağırışlara uyğunlaşdırılmalıdır”,- o bildirib.

Onun sözlərinə görə, Azərbaycanda ən çox rast gəlinən kibercinayətlər bank məlumatlarının ələ keçirilməsi, onlayn dələduzluq, sosial şəbəkələr üzərindən şantaj və cinsi xarakterli cinayətlərdir. O qeyd edib ki, saxta alış-veriş saytları və müxtəlif fişinq üsulları vasitəsilə vətəndaşların bank kartı və şəxsi məlumatlarının oğurlanması halları üstünlük təşkil edir.

“Vətəndaşlar mənbəyi məlum olmayan keçidlərə daxil olarkən və şəxsi məlumatlarını paylaşarkən son dərəcə diqqətli olmalıdırlar”, - o vurğulayıb.

Aytac