Azərbaycan kibertəhlükəsizlik sahəsində beynəlxalq əməkdaşlığı gücləndirir

Azərbaycanda kibertəhlükəsizliyin təmin olunması üçün bir sıra ixtisaslaşmış dövlət qurumları fəaliyyət göstərir.  Bunu Azərbaycan Respublikası Baş Prokurorluğunun Cinayət təqibindən kənar icraatlar idarəsinin prokuroru Emin İsmayılzadə bildirib.

Onun sözlərinə görə, Daxili İşlər Nazirliyinin Kibercinayətkarlıqla Mübarizə Baş İdarəsi, Dövlət Təhlükəsizliyi Xidmətinin Milli Kibertəhlükəsizlik Mərkəzi və digər aidiyyəti qurumlar bu sahədə koordinasiyalı fəaliyyət göstərirlər.

O qeyd edib ki, Dövlət Təhlükəsizliyi Xidmətinin tərkibində fəaliyyət göstərən qurum əsasən kritik dövlət infrastrukturuna yönələn kibertəhdidlərin qarşısının alınması ilə məşğuldur. O xatırladıb ki, 44 günlük Vətən müharibəsi dövründə Azərbaycana qarşı çoxsaylı kiberhücum cəhdləri qeydə alınsa da, aidiyyəti qurumların birgə fəaliyyəti nəticəsində bu təhdidlər zərərsizləşdirilib.

"Bu ilin əvvəlindən fəaliyyətini Milli Kibertəhlükəsizlik Agentliyi adı ilə davam etdirən qurum da informasiya sistemlərinin qorunması, kibertəhlükəsizlik sahəsində maarifləndirmə və preventiv tədbirlərin həyata keçirilməsi istiqamətində mühüm rol oynayır",- o vurğulayıb.

Onun sözlərinə görə, kibercinayətlərlə mübarizədə dövlət və özəl sektor əməkdaşlığı xüsusi əhəmiyyət daşıyır: “Kiberməkanın böyük hissəsi bankların, internet provayderlərinin, telekommunikasiya operatorlarının və digər özəl şirkətlərin nəzarətindədir. Buna görə də hüquq-mühafizə orqanları ilə özəl sektor arasında operativ məlumat mübadiləsi cinayətlərin qarşısının vaxtında alınmasına imkan verir”.

Aytac