AQTA: Azərbaycanda quş qripi və nyukasl xəstəliyi aşkarlanmayıb

Azərbaycanda, o cümlədən Naxçıvanda 2025-ci ilin noyabr-dekabr ayları və 2026-cı ilin yanvar-may aylarında aparılan monitorinqlər zamanı quş qripi və Nyukasl xəstəliyinə yoluxma halları aşkar edilməyib. Bu barədə Azərbaycan Qida Təhlükəsizliyi Agentliyi (AQTA) məlumat yayıb.

AQTA-nın məlumatına görə, monitorinqlər riskli hesab olunan su-bataqlıq ərazilərində, dənizkənarı zonalarda, milli parklarda, qoruqlarda, ovçuluq təsərrüfatlarında, çay və su anbarları ətrafında aparılıb. Vəhşi quşlardan və quşçuluq təsərrüfatlarında saxlanılan ev quşlarından laborator müayinələr üçün nümunələr götürülüb.

Agentlik bildirib ki, təbiət əraziləri, quşçuluq obyektləri, bazarlar, zooparklar və dekorativ quş saxlanılan məkanlarda da müşahidələr aparılıb, baytarlıq qaydalarına əməl olunması ilə bağlı maarifləndirmə tədbirləri həyata keçirilib.

Laborator analizlərin nəticələrinə əsasən, ölkə ərazisində quş qripi virusu və xəstəliyə şübhəli hallar qeydə alınmayıb. Ev quşlarından götürülən nümunələrin Nyukasl xəstəliyi üzrə müayinələri də mənfi nəticə verib.