Rusiyanın səhiyyə naziri Azərbaycana gəlib

Rusiyanın səhiyyə naziri Mixail Muraşkonun rəhbərlik etdiyi nümayəndə heyəti Azərbaycana səfər edib və səhiyyə naziri Teymur Musayevlə ikitərəfli əməkdaşlığın inkişaf perspektivlərini müzakirə edib.

Azərbaycan Səhiyyə Nazirliyinin yaydığı məlumata görə, görüşdə səhiyyə sahəsində mövcud əməkdaşlıq əlaqələri, eləcə də onların genişləndirilməsi imkanları nəzərdən keçirilib.

Teymur Musayev bildirib ki, Azərbaycan və Rusiya arasında tibb təhsili, tibbi kadrların hazırlanması, ixtisasartırma proqramları, elmi tədqiqatlar, rəqəmsal səhiyyə və ictimai səhiyyə istiqamətlərində əməkdaşlığın inkişafı üçün əlverişli imkanlar mövcuddur.

Mixail Muraşko isə Rusiya tərəfinin səhiyyə sahəsində əməkdaşlığın genişləndirilməsinə böyük önəm verdiyini qeyd edib. Onun sözlərinə görə, təcrübə mübadiləsi, birgə elmi-praktik layihələrin həyata keçirilməsi və mütəxəssislər arasında əməkdaşlıq hər iki ölkənin səhiyyə sisteminin inkişafına töhfə verə bilər.

Tərəflər görüş zamanı qarşılıqlı maraq doğuran digər məsələlər ətrafında da fikir mübadiləsi aparıblar və səhiyyə sahəsində əməkdaşlığın gələcəkdə də davam etdirilməsi niyyətini ifadə ediblər.