Bakıda kommunal, lift, işıqlandırma və yaşıllaşdırma xidmətləri üzrə yeni MMC-lər yaradılacaq

Azərbaycan Nazirlər Kabineti Bakı Şəhər İcra Hakimiyyətinin tabeliyində fəaliyyət göstərən mənzil-kommunal, lift, işıqlandırma və yaşıllaşdırma xidmətlərinin idarə edilməsinin təkmilləşdirilməsi məqsədilə yeni müəssisələrin yaradılmasını nəzərdə tutan qərar qəbul edib.

Baş nazir Əli Əsədovun imzaladığı qərara əsasən, Bakı Şəhər İcra Hakimiyyəti başçısının tabeliyində fəaliyyət göstərəcək Mənzil-kommunal Təsərrüfatı, Lift Təsərrüfatı, İşıqlandırma Təsərrüfatı və Yaşıllaşdırma Təsərrüfatı müəssisələrinin nümunəvi strukturu və ştat vahidləri təsdiqlənib.
Sənədə əsasən, Bakı Şəhər İcra Hakimiyyəti üç ay ərzində mövcud xidmət qurumlarının bazasında məhdud məsuliyyətli cəmiyyət (MMC) statusunda həmin müəssisələrin yaradılması ilə bağlı təkliflərini Nazirlər Kabinetinə təqdim etməli, onların nizamnamələrini hazırlamalı və təsdiq olunması üçün zəruri tədbirlər görməlidir.

Qərara görə, yeni yaradılacaq müəssisələrin nizamnamə kapitalı müvafiq sahələrdə xidmət göstərən mövcud qurumların əmlakı hesabına formalaşdırılacaq.

Bundan əlavə, Bakı Şəhər İcra Hakimiyyəti müəssisələrin əməkhaqlarını Vahid Tarif Cədvəlinə uyğun müəyyən etməli, həmçinin Əmlak Məsələləri Dövlət Xidməti, Ekologiya və Təbii Sərvətlər Nazirliyi və digər aidiyyəti qurumlarla birlikdə "Azərkosmos"un informasiya sistemlərindən istifadə etməklə Bakı şəhərində sanitar təmizlik və yaşıllaşdırma xidmətlərinin əhatə etdiyi əraziləri müəyyənləşdirərək məlumatları Maliyyə Nazirliyinə təqdim etməlidir