Sosial şəbəkələrdə kompensasiyaya dair yayılan informasiyalar saxtadır - BİRGƏ MƏLUMAT

Sosial şəbəkələrdə və müxtəlif mesajlaşma platformalarında özəlləşdirmə çeklərinə görə guya kompensasiya ödənilməsi, qeydiyyat aparılması və bunun üçün müəyyən mobil nömrələrlə əlaqə saxlanılmasının zəruri olduğu barədə həqiqətə uyğun olmayan məlumatlar yayılır.

Daxili İşlər Nazirliyi (DİN) və Medianın İnkişafı Agentliyinin (MEDİA) birgə məlumatında bildirilib ki, bu iddialar həqiqəti əks etdirmir və vətəndaşlarda çaşqınlıq yaratmağa yönəlib.

Qurumlar vətəndaşları saxta elanlara inanmamağa çağıraraq naməlum telefon nömrələri ilə əlaqə saxlamamağı, bank kartı rekvizitlərini, şəxsiyyət vəsiqəsi məlumatlarını, SMS-lə göndərilən təsdiq kodlarını və digər şəxsi maliyyə məlumatlarını heç bir halda üçüncü şəxslərə verməməyi, həmçinin hər hansı ödəniş etməməyi tövsiyə ediblər.

Qeyd olunub ki, saxta məlumatların yayılması ilə bağlı araşdırma aparılır.