Peşə təhsilində beynəlxalq sertifikatlar və dual təhsil imkanları genişləndirilir – İlqar Bayramlı

Azərbaycanda peşə təhsilinin keyfiyyətinin artırılması məqsədilə beynəlxalq sertifikatlaşdırma, dual təhsil və işəgötürənlərlə əməkdaşlıq imkanları genişləndirilir. Bu barədə Peşə Təhsili üzrə Dövlət Agentliyinin direktoru İlqar Bayramlı tələbə qəbulu ilə bağlı keçirilən brifinqdə bildirib.

Bayramlının sözlərinə görə, Code Academy, Baku Design Academy, IMZA Group və KVET Əlavə Təhsil Mərkəzi ilə əməkdaşlıq çərçivəsində beynəlxalq sertifikat proqramları həyata keçirilir. Cari ildə yeddi ixtisas üzrə – interyer dizaynı, kibertəhlükəsizlik, veb-dizayn və proqram təminatçılığı, qrafik dizayn, informasiya texnologiyaları üzrə texniki dəstək, mühasibat uçotu və elektrik qaz qaynaqçılığı sahələrində tələbələrə beynəlxalq sertifikat əldə etmək imkanı yaradılıb.

O bildirib ki, regionların inkişafı qəbul siyasətinin əsas prioritetlərindən biridir. Qəbul planının 66%-i regionlarda yerləşən peşə təhsili müəssisələrinin, 34%-i isə Bakı şəhərinin payına düşür.

Direktorun sözlərinə görə, dual peşə təhsili modeli də genişləndirilir. Bu il 57 ixtisas üzrə 2 560 tələbənin dual təhsil proqramına qəbulu planlaşdırılır. Proqram 150-dən çox işəgötürənlə əməkdaşlıq əsasında həyata keçiriləcək.

Bayramlı əlavə edib ki, peşə təhsilində inklüzivliyin və gender balansının gücləndirilməsi istiqamətində də irəliləyiş əldə olunub. Belə ki, qadınların peşə təhsilində iştirak payı 2022-ci ildəki 32%-dən 2025-ci ildə 40%-ə yüksəlib.

Gülnar Nazimqızı