“Azərsun Holdinq”in dəstəyi ilə “Mediada Azərbaycan dili” kitabı nəşr olunub

Medianın İnkişafı Agentliyi və "Azərbaycan Televiziya və Radio Verilişləri” QSC-nin nəzdində fəaliyyət göstərən Teleradio Akademiyasının birgə təşəbbüsü və "Azərsun Holdinq”in dəstəyi ilə "Mediada Azərbaycan dili” kitabı dərc edilib. 

AZXEBER.COM xəbər verir ki, kitab eyni adlı təlim proqramı çərçivəsində keçirilən görüşlər əsasında hazırlanıb. Nəşrin əsas məqsədi Azərbaycan ədəbi dilinin normaları ilə bağlı bilik və bacarıqların inkişaf etdirilməsi, audiovizual mediada dil mədəniyyətinin yüksəldilməsinə və peşəkar nitq mühitinin formalaşdırılmasına töhfə verməkdir.

Kitabın müəllifləri – Azərbaycan Milli Elmlər Akademiyasının Nəsimi adına Dilçilik İnstitutunun direktoru, professor Nadir Məmmədli, BDU-nun kafedra müdirləri - filologiya elmləri doktoru, professor Qulu Məhərrəmli, filologiya elmləri üzrə fəlsəfə doktoru, dosent Xatirə Hüseynova və filologiya elmləri üzrə fəlsəfə doktoru, dosent Aynur Nəsirova nəşrin hazırlanmasının məqsədi, mediada daha çox rast gəlinən dil qüsurları və vəsaitin jurnalistlərin gündəlik fəaliyyətində istifadə oluna biləcək praktik mənbə kimi əhəmiyyəti barədə məlumat veriblər. Vəsaitdə layihə çərçivəsində təlim keçən digər dilçi alimlərin, media mütəxəssislərinin tövsiyə və yanaşmalarına da yer verilib.

Bu kitab təkcə media nümayəndələri üçün deyil, həm də jurnalistika ixtisası üzrə təhsil alan tələbələr üçün qiymətli mənbə olacaq.

Qeyd edək ki, Azərbaycan dili "Azərsun Holdinq”in əsas diqqət ayırdığı istiqamətlərdən biridir. Belə ki, sosial məsuliyyət layihələrindən olan "WikiSun” layihəsi çərçivəsində şirkət əməkdaşlarının ana dilində yazdığı 5000 yaxın məqalə Vikipediyaya yerləşdirilib. Eyni zamanda 30 yaxın media nümayəndəsinə "Süni intellekt alətlərindən istifadə etməklə ana dilində məzmun yaratmaq” mövzusunda təlim keçirilib.