FHN həftəsonu su hövzələrinə üz tutacaq vətəndaşlara müraciət edib

Fövqəladə Hallar Nazirliyi (FHN) istirahət və sərinləmək məqsədilə su hövzələrinə üz tutan vətəndaşları təhlükəsizlik qaydalarına ciddi əməl etməyə çağırıb. Nazirlik bəzi hallarda bu qaydalara riayət olunmamasının faciəvi nəticələrə səbəb olduğunu bildirib. 

FHN-in müraciətində çimərlik kimi nəzərdə tutulmayan ərazilərdə, o cümlədən kanal, çay, arx və digər su hövzələrində çimməyin, həmçinin çimmə zonasının işarələnmiş sərhədlərindən kənara üzməyin qadağan olunduğu qeyd edilib.

Nazirlik, həmçinin xilasetmə texnikası istisna olmaqla digər qayıq və kiçik gəmilərlə çimərlik ərazisinə daxil olmağın yolverilməz olduğunu vurğulayıb.

Müraciətdə bildirilib ki, uşaqlar çimərlikdə nəzarətsiz buraxılmamalı, xəbərdaredici nişan və lövhələrin tələblərinə, eləcə də xilasedicilərin göstərişlərinə əməl edilməlidir. FHN qızmar günəş altında uzun müddət qalmağın və hava qaraldıqdan sonra suya girməyin təhlükəli olduğunu da xatırladıb.