10 milyon manatlıq qanunsuz mərc dövriyyəsi: Bu şəbəkələr necə işləyir?

Azərbaycanda qanunsuz mərc oyunları təşkil edən şəbəkə vasitəsilə 10 milyon manatlıq dövriyyə həyata keçirildiyi müəyyən edilib.

Kibercinayətkarlıqla Mübarizə Baş İdarəsinin keçirdiyi əməliyyat nəticəsində “Xbet” və “MostBet” üzərindən qanunsuz mərc oyunları təşkil etməkdə şübhəli bilinən 5 nəfər saxlanılıb.

Araşdırma zamanı müəyyən edilib ki, şübhəli şəxslər “Telegram”da yaratdıqları kanallar vasitəsilə istifadəçiləri qanunsuz mərc və kazino oyunlarına cəlb ediblər. Şəbəkə üzərindən həyata keçirilən əməliyyatlar nəticəsində 10 milyon manatlıq qanunsuz mərc dövriyyəsi formalaşıb.

Hüquq-mühafizə orqanlarının məlumatına görə, əldə olunan vəsaitlərin leqallaşdırılmasına da cəhd göstərilib.

Qanunsuz mərc şəbəkələri, bir qayda olaraq, istifadəçiləri sosial şəbəkələr və mesajlaşma platformalarında yerləşdirilən reklam və elanlar vasitəsilə cəlb edir. İstifadəçilərə bonuslar, yüksək əmsallar və böyük uduşlar vəd olunur. Ödənişlər isə müxtəlif bank hesabları və elektron ödəniş vasitələri üzərindən həyata keçirilə bilər.

Mütəxəssislər bildirirlər ki, bu cür fəaliyyət maliyyə itkiləri ilə yanaşı, şəxsi və bank məlumatlarının ələ keçirilməsi, vergidən yayınma və pul vəsaitlərinin leqallaşdırılması kimi risklər yaradır.

İstifadəçilərə mərc və şans oyunları platformalarından istifadə etməzdən əvvəl onların qanuni fəaliyyət göstərib-göstərmədiyini və müvafiq icazəyə malik olub-olmadığını yoxlamaq tövsiyə olunur.