Deputat: qanunlara baxmayaraq, erkən nikahların qarşısını tam ala bilmirik

Azərbaycanda erkən və qohum nikahlarının, eləcə də məişət zorakılığının qarşısının alınması üçün qanunvericilik mövcud olsa da, belə hallar hələ də baş verir. Bunu deputat Tamam Cəfərova bildirib.

“Bu sahədə xeyli uğurlarımız var, amma təəssüf ki, hadisələrin qarşısını tam ala bilmirik. Mətbuatdan vaxtaşırı 16-17 yaşlı qızların nişan və toy mərasimlərinin icra hakimiyyəti və polisin müdaxiləsi ilə dayandırıldığını görürük”, - Cəfərova deyib.

Onun sözlərinə görə, bəzi valideynlər qanunun tələblərini bilsələr də, erkən nikahları dolayısı yollarla təşkil etməyə çalışırlar.

Deputat regionlarda valideynlərin, müəllimlərin, ağsaqqalların və din xadimlərinin iştirakı ilə maarifləndirmə tədbirlərinin keçirilməsini təklif edib.

“Universitet tələbələri gələcəyin valideynləridir. Onların qadın və uşaq hüquqları, eləcə də məişət zorakılığı barədə indidən maarifləndirilməsi qabaqlayıcı tədbir kimi faydalı ola bilər”, - o bildirib.

Cəfərova maarifləndirmə tədbirlərinin hərbi hissələrdə də keçirilməsini mümkün sayıb və Türkiyədə əsgərlər üçün məişət zorakılığı mövzusunda təlimlərin təşkil olunduğunu nümunə göstərib.

Gülnar Nazimqızı