SOCAR AQŞ-nin kapitalı 35% azalıb, zərəri 44 milyon manatı ötüb

SOCAR AQŞ MMC-nin balans kapitalı 2025-ci ildə 34,8% azalaraq 79,5 milyon manata düşüb, öhdəlikləri isə 12,6% artaraq 300,9 milyon manata çatıb.

Şirkətin maliyyə hesabatına əsasən, SOCAR AQŞ ötən ili 44,027 milyon manat xalis zərərlə başa vurub. Zərər 2024-cü illə müqayisədə 7,6% artıb.

Şirkətin gəlirləri il ərzində 19,9% azalaraq 68,871 milyon manat təşkil edib. Xidmətlərin maya dəyəri 20,3% azalaraq 105,6 milyon manat olsa da, gəlirlər həmin xərcləri qarşılamaq üçün kifayət etməyib.

Maliyyə və müqavilə aktivləri üzrə gözlənilən kredit zərərlərinə xalis ayırmalar 2,1 dəfə artaraq 14,654 milyon manata, maliyyə xərcləri 5,3 dəfə artaraq 6,668 milyon manata çatıb. Valyuta məzənnəsi fərqindən zərər isə 8,7 dəfə artaraq 1,123 milyon manat olub.

Şirkət 2025-ci ildə torpaq, tikili və avadanlıqların qiymətdən düşməsi üzrə 926 min manat, avans ödənişlərinin dəyərsizləşməsi üzrə isə 1,869 milyon manat xərc tanıyıb. Əvvəlki ildə bu maddələr üzrə xərc qeydə alınmamışdı.

SOCAR AQŞ-nin birgə müəssisələrdəki payından gəliri 4,6% azalaraq 27,56 milyon manat, digər gəlirləri isə 4,7 dəfə artaraq 3,99 milyon manat təşkil edib.

2026-cı il yanvarın 1-nə şirkətin aktivləri 2,3% azalaraq 380,378 milyon manat olub.

SOCAR AQŞ 2007-ci ildə yaradılıb və neft-qaz quyularının qazılması və təmiri ilə məşğuldur. Şirkətin 73,8%-i “Nobel Oil LTD”nin Azərbaycandakı filialına, 13,4%-i SOCAR-a, 12,8%-i isə “Abşeron Qazma” MMC-yə məxsusdur.

Gülnar Nazimqızı