Bakının mərkəzində avtomobil hərəkəti bütün həftə məhdudlaşdırılacaq

Oktyabrın 5-dən Bakının bir sıra mərkəzi küçələrində avtomobillərin hərəkətinə məhdudiyyət həftəsonları ilə yanaşı, həftənin bütün günlərində test rejimində tətbiq ediləcək. Bu barədə Azərbaycan Yerüstü Nəqliyyat Agentliyi (AYNA) məlumat yayıb.

Yeni qaydalar aşağıdakı əraziləri əhatə edəcək:

Zərifə Əliyeva küçəsinin Rəsul Rza küçəsi ilə kəsişməsindən sonrakı hissəsi;
Əbdülkərim Əlizadə küçəsi;
Hacı Zeynalabdin Tağıyev küçəsi;
Tərlan Əliyarbəyov küçəsi;
Yusif Məmmədəliyev küçəsi.

Qərar Nəqliyyatı Əlaqələndirmə Şurası tərəfindən mobilliyin artırılması, piyadaların rahatlığının təmin olunması və piyada hərəkətinin təşviqi məqsədilə qəbul edilib.

Fərdi parklanma talonu olan sakinlərin, eləcə də operativ, tibbi, kommunal və logistika xidmətləri göstərən nəqliyyat vasitələrinin əraziyə giriş-çıxışına icazə veriləcək.

AYNA-nın məlumatına görə, təşəbbüs piyada zonaları arasında əlaqəni genişləndirməyə, şəhər mərkəzində daha rahat və təhlükəsiz mühit yaratmağa, həmçinin ərazinin turizm və biznes potensialını artırmağa xidmət edir.