Ölkədə beyin oyunları geriləyib, fiziki idmana maraq yüksəlib - statistika

Azərbaycanda idman bölmələrində məşğul olanların sayı 2025-ci ildə 2024-cü illə müqayisədə 2,9% azalaraq 387 859 nəfərə düşüb. Ən böyük nisbi azalma nərd bölmələrində - 23%, dama bölmələrində isə 20% olub. Bu barədə Dövlət Statistika Komitəsindən bildirilib. 

 2025-ci ildə taekvondo ilə məşğul olanların sayı 12,7%, stolüstü tennisdə 10,2%, yüngül atletikada 5,1%, atıcılıqda 4,1%, voleybolda 3,3% azalıb.

Futbol, sərbəst güləş, futzal, yunan-Roma güləşi, kikboksinq və şahmat bölmələrində də iştirakçıların sayı aşağı düşüb.

Şahmatla məşğul olanların sayı 44 396-dan 43 604-ə enib.

Eyni dövrdə 13 idman növü üzrə iştirakçı sayı artıb.

Cüdo bölmələrində bu göstərici 12 402-dən 13 645-ə, qılıncoynatmada 317-dən 824-ə yüksəlib.

Basketbol bölmələrində iştirakçıların sayı 21 995-dən 22 662-yə, bədii gimnastikada 963-dən 1 226-ya, üzgüçülükdə isə 15 268-dən 15 675-ə çatıb.

Gülnar Nazimqızı