Azərbaycanın əsas neft emalı zavodunun tikintisinə gələn il başlanılacaq

"Report" xəbər verir ki, bunu Azərbaycan Iqtisadiyyat Nazirliyi və SOCAR-ın təşkilatçılığı ilə Bakıda keçirilən "Sənayenin inkişafına dövlət dəstəyi" adlı tədbirdə Neft-qaz emalı və Neft-kimya Kompeksinin baş direktorunun müavini Emil Alxaslı bildirib. 

E.Alxaslı qeyd edib ki, FEED layihə işləri bu ilin sonuna kimi yekunlaşdıqda tikinti mərhələsinə keçilməsi planlaşdırılır. Onun sözlərinə görə, zavodun yenidən qurulması layihəsinin üç mərhələdə icrası nəzərdə tutulub. 2018-ci ilin iyun ayına qədər yeni bitum qurğusunun istismara verilməsi planlaşdırılır. 

Direktor müavini əlavə edib ki, 2019-cu ilin iyun ayına qədər müəssisədə "Euro-5" standartına uyğun dizel yanacağı istehsalına başlanması nəzərdə tutulur. Üçüncü mərhələdə isə "Euro-5" standartına cavab verən benzin istehsalının təşkili nəzərdə tutulur. Onun sözlərinə görə, artıq 2020-ci ilin may ayına qədər "Euro-5" standartına cavab verən qurğular istifadəyə veriləcək.