Əhalinin köhnə borclarını "Azərsu" hansı qiymətlərlə hesablayacaq?

Qurumun Mətbuat xidmətinin rəhbəri Anar Cəbrayıllı Trend-ə açıqlamasında yayılan məlumatları təkzib edib: "Yeni tariflərin tətbiqinin abonentlərin əvvəlcədən yaranmış borclarına heç bir təsiri olmayacaq. Sayğacla təmin olunmayan abonentlər ödənişləri ailə üzvlərinin sayına görə aparırlar. Tarif Şurasının qərarına görə, 1 nəfər üçün aylıq norma 5 kubmetr götürülür. Əgər ailədə 4 nəfər varsa, aylıq sərfiyyat 20 kubmetr olacaq və bunun 10 kubmetri (ayın birinci yarısı üçün) regiondan asılı olaraq 31 və ya 36 qəpikdən, qalan 10 kubmetri isə (ayın ikinci yarısı üçün) 45 və ya 50 qəpikdən hesablanacaq".

Smart-kart tipli sayğaclardan istifadə edən abonentlərin mayın 16-na qədər kartlarına yüklədikləri məbləğə gəlincə isə A.Cəbrayıllı bildirib ki, həmin məbləğ köhnə tariflərlə, mayın 16-dan etibarən isə yeni tariflərlə hesablanacaq.

O qeyd edib ki, mexaniki sayğaclarla bağlı isə sayğacın son oxunması ilə tariflər dəyişdikdən sonrakı oxunma arasındakı sərfiyyat günlərin sayına bölünərək orta günlük sərfiyyat çıxarılacaq: "Neçə gün köhnə tarixə düşəcəksə, köhnə tariflə, neçə gün yeni tarixə düşəcəksə, yeni tariflə hesablama aparılacaq. Məsələn, sayğac sonuncu dəfə aprelin 20-də, növbəti dəfə mayın 20-də oxunubsa və 30 gündə 30 kubmetr su sərfiyyatı varsa, günə 1 kubmetr su sərfiyyatı düşür. Bu 30 günün 16 maya qədər olan hissəsi (25 gün) köhnə, qalan günlər (5 gün) isə yeni tariflə hesablanacaq".

"Azərsu" ASC mexaniki sayğacların göstəricilərinin vaxtında və dəqiq oxunması üçün abonentlərdən müfəttişlərə lazımi şəraitin yaradılmasını xahiş edir.