Bakıda ən çox gecikən marşrutlar - Siyahı

Axar.az xəbər verir ki, bu barədə tanınmış ilahiyyatçı Rəsul Mirhəşimli Feysbuk səhifəsində yazıb. O bildirib ki, sözügedən problem bundan əvvəl gündəmə gəlsə də, həllini tapmayıb:

"Bu problem barədə sentyabrın 28-də yazdım. Həmin gün səhər avtobus 27 dəqiqə gecikmişdi. BNA-nın mətbuat xidmətinin rəhbəri Mais Ağayev bildirdi ki, problemi müvafiq şöbə araşdırır, yaxın zamanda həll olunacaq. Amma heç nə dəyişmədi.

Bu gün səhər 199 saylı avtobus 36 dəqiqə gecikdi. Bununla bağlı Xaliq Faiqoğlu MMC-nin mətbuat katibi Nizam Rzayevlə danışdım. O da problemin çox ciddi olduğunu bildirdi.

Hər gün bu ərazidə yaşayan sərnişinlər işə gecikir, axşam pik saatlarında avtobusa minə bilmirlər. Çarəni 1 manatlıq taksilərlə və Sumqayıt avtobusları ilə getməklə tapırlar”.

Sözgedən problem paytaxtın müxtəlif istiqamətlərində hərəkət edən digər avtobuslarda da müşahidə olunur. Belə ki, sakinlər daha çox 3, 6, 8, 13, 17, 61, 202 nömrəli avtobusların gecikməsindən şikayətçidirlər.