Azərbaycanda 2022-ci ilin 1-ci rübündə qazma, hasilat, emal və ixrac

Azərbaycanda neft və qaz hasilatı ilə məşğul olan xarici şirkətlərin birləşdiyi konsorsiumun fəaliyyətini də nəzərə alsaq ölkədə neft və qaz hasilatı 8,3 milyon ton və 11,8 milyard kubmetr təşkil edib. Neft hasilatı keçən ilin uyğun dövrü ilə müqayisədə azalsa da qaz hasilatı 13,5 faiz artıb.

Hesabat dövründə SOCAR dünya bazarına təxminən 4,1 milyon ton xam neft, Gürcüstana isə 770 milyon kubmetr təbii qaz ixrac edib. SOCAR-ın Gürcüstana qaz ixracı ötən ilin müvafiq dövrü ilə müqayisədə 50,6% artıb. SOCAR həm öz vəsaiti hesabına hasil edilən xam nefti, həm də SOCAR və Azərbaycanın beynəlxalq konsorsiumlarının neft hasilatındakı paylarını ixrac edir. Ümumilikdə ölkədən 6,7 milyon ton neft və 5,9 milyard kubmetr qaz ixrac edilib. Ötən ilin müvafiq dövrü ilə müqayisədə ölkənin qaz ixracında 14,7% artım qeydə alınıb.

Şirkətin Azərbaycandakı neft emalı kompleksi 1,6 milyon ton0 neft və 948 milyon kubmetr təbii qaz emal edib. Ötən ilin müvafiq dövrü ilə müqayisədə neft emalı 9,7 faiz artıb.

2022-ci ilin birinci rübündə SOCAR Azərbaycandakı müəssisələri tərəfindən hasil edilən 561 min tona yaxın neft, neft və qaz kimyası məhsulunu xaricə ixrac edib. Ölkə üzrə təbii qaz istehlakı 9,3% artaraq 4,8 milyard kubmetrə yaxın olub. Karbamid və metanol zavodlarının istehsalının, eləcə də məişət qazının idxalının kəskin artması ölkədə qaz istehlakının artmasına səbəb olub.