"Gilar" qızıl yatağında kəşfiyyat işləri aparılacaq

Böyük Britaniyanın "Anglo Asian Mining” şirkəti (AAM – Azərbaycanda qızıl yataqlarının işlənməsi üzrə operator – red) 2022-ci ilin sonuna kimi Gilar faydalı qazıntı yatağında əlavə kəşfiyyat qazma işləri aparmağı planlaşdırır.

"Cari il ərzində "Gilər” yatağında almaz qazma üsulu ilə 30 quyu qazılıb. Qazma zamanı təxminən 300 metr dərinlikdə mis minerallaşmasının üç əsas zonası aşkar edilib.  Mineral Resurslar üzrə ilk qiymətləndirmə  təxminən 2022-ci ilin dördüncü rübünün sonuna qədər dərc olunacaq”, - AAM-ın açıqlamasında deyilir.

Şirkətin məlumatına görə, bu sahədə iki növ minerallaşma var -  kvars damarlarında qızıl və hidrotermal məhlullardan qızıl-mis filizinin əmələ gəlməsi.

"Qazma işlərinin dərinliyi (təxminən 450 metr) nəzərə alınmaqla həm kəşfiyyat, həm də hasilat üçün əlverişli yeraltı çıxış planı hazırlanıb. 2022-ci ilin dördüncü rübündə kəşfiyyat tuneli çəkiləcək və bundan gələcək hasilat üçün də istifadə olunacaq. Hazırda yataqda açıq minerallaşma uzantılarının sınaqdan keçirilməsi üçün genişmiqyaslı quru əsaslı geofizika proqramı aparılır.

Gilar Gədəbəy müqavilə sahəsində, şirkətin emal müəssisələrindən təxminən yeddi kilometr aralıda yerləşir.

PSA müqaviləsi 1997-ci il avqustun 21-də imzalanıb və 6 yatağın işlənməsini nəzərdə tuturdu. Müqavilədə Azərbaycanın payı 51%, Anglo Asian Mining PLC - 49% təşkil edir.

2021-ci ilin sentyabrında imzalanmış yeni müqaviləyə əsasən, şirkət sərəncamında üç yeni müqavilə bloku aldı və birini inkişaf etdirmək hüquqlarından imtina etdi. Beləliklə, hazırda şirkət Azərbaycanda 8 müqavilə sahəsinin işlənməsi hüququna malikdir.

Gədəbəy yatağından ilk qızılın hasilatı 2009-cu ildə, gümüşün çıxarılması isə 2010-cu ildə başlanmışdır. 2013-cü ilin sentyabr ayında şirkət Qoşa müqavilə sahəsinin işlənməsinə başladı.

Hazırda Anglo Asian Mining Gədəbəy və Qoş müqavilə sahələrindən qiymətli metalların hasilatı ilə məşğuldur.