KOB-ların məhsul və xidmətlərinin təqdim edilməsinə dəstək göstəriləcək

Xəzər Beynəlxalq Nəqliyyat, Tranzit və Logistika Sərgisində KOB-ların məhsul və xidmətlərinin təqdim edilməsinə dəstək göstəriləcək.

Bu barədə İqtisadiyyat Nazirliyinin tabeliyində Kiçik və Orta Biznesin İnkişafı Agentliyi (KOBİA) məlumat yayıb.

Xatırladaq ki, 31 may - 2 iyun tarixlərində Bakı Ekspo Mərkəzində 20-ci Yubiley Xəzər Beynəlxalq Nəqliyyat, Tranzit və Logistika Sərgisi ("TransLogistica”) keçiriləcək. Sərgidə avtomobil, dəmir yolu, hava və dəniz nəqliyyatı, yükdaşıma, logistika, kuryer vasitəsilə çatdırılma sahələrində fəaliyyət göstərən dövlət və özəl qurumların xidmətləri, müxtəlif nəqliyyat vasitələri, qoşqular, avadanlıqlar, anbar və məlumatlandırma sistemləri və s. nümayiş olunacaq. Tədbir nəqliyyat və logistika sahələrində yeni texnologiyaların və məhsulların sərgilənməsi, satış imkanlarını genişləndirmək və yeni satış kanalları tapmaq, təcrübə mübadiləsi üçün geniş imkanlar yaradacaq.

Nəqliyyat sektorunda çoxlu sayda mikro, kiçik və orta sahibkarlıq subyektlərinin fəaliyyət göstərməsi nəzərə alınaraq onların məhsul və xidmətlərinin tanıdılması ilə satış imkanlarının genişləndirilməsi məqsədilə "TransLogistica” sərgisində KOB-ların iştirakına dəstək göstəriləcək. Bu məqsədlə KOBİA tərəfindən təmin ediləcək dövlət dəstəyi hesabına sərgidə KOB-ların məhsul və xidmətlərinin təqdim olunacağı xüsusi stend qurulacaq.