Xarici valyuta alış-satışı əməliyyatları azalıb

"Hesabat dövründə bankların nağd xarici valyutanın alqı-satqısı üzrə əməliyyatlarının həcmi 971 milyon ABŞ dolları təşkil edib ki, bunun da 83,1 faizi ABŞ dollarının payına düşüb", - Mərkəzi Bankdan bildirilib.

Mərkəzi Bank qeyd edib ki, 2023-cü ilin birinci rübündə xarici valyuta satışı 2022-ci ilin eyni dövrü ilə müqayisədə 6 dəfə azalıb.

Mərkəzi Bank vurğulayıb ki, yanvar-mart aylarında Azərbaycanın nağdsız valyuta bazarının həcmi dollar ifadəsində 6,8 milyard təşkil edib. Bu 2022-ci ilin dördüncü rübü ilə müqayisədə 8% azdır.  "Valyuta bazarında aparılan əməliyyatların 80,6 faizi dolların, 19,4 faizi isə digər valyutaların payına düşüb", - Mərkəzi Bankdan bildirilib.

Mərkəzi Bankdan verilən məlumata görə, nağdsız valyuta əməliyyatlarının 21,3 faizi banklararası valyuta bazarında, 78,7 faizi isə bankdaxili valyuta bazarında aparılıb.

Birinci rüb ərzində banklararası valyuta bazarında əməliyyatların 98%-i ABŞ dolları ilə aparılıb. "Hesabat dövründə əməliyyatların həcmi 2022-ci ilin yanvar-mart ayları ilə müqayisədə 35% azalaraq 1,4 milyard dollar ekvivalentində olub. Banklararası valyuta bazarında valyuta əməliyyatlarının dövriyyəsi əsasən Bloomberg platformasında aparılan əməliyyatlar hesabına formalaşıb. ”, bank qeyd edir.

Bankdaxili valyuta bazarında aparılan valyuta əməliyyatlarının həcmi 5,3 milyard ABŞ dolları (artım 3,4%) ekvivalentində olub ki, bunun da 76 faizi ABŞ dolları ilə aparılıb. Bankdaxili valyuta bazarında aparılan valyuta əməliyyatlarının 93,2 faizi hüquqi şəxslərlə aparılan əməliyyatların payına düşüb.