SOCAR və “TotalEnergies” II fazaya başlamağa hazırlaşır

"SOCAR-ın  prezidenti Rövşən Nəcəf cümə axşamı Fransanın "TotalEnergies” şirkətinin baş vitse-prezidenti Jan-Lük Giziou ilə görüşüb. "Görüş zamanı Xəzər dənizindəki "Abşeron" qaz-kondensat yatağının işlənməsi layihəsinin hazırkı vəziyyəti müzakirə edilib və Azərbaycanın hasilat potensialının artırılmasının zəruriliyi qeyd edilib", - SOCAR-ın məlumatında deyilir.

Tərəflər həmçinin yatağın işlənməsinin ikinci mərhələsi çərçivəsində görüləcək işlərlə bağlı fikir mübadiləsi aparıblar.

Hazırda hasilatın birinci mərhələsi çərçivəsində "Abşeron” yatağından gündəlik 4,3 milyon kubmetr qaz və 1400 ton kondensat hasil edilir.

2023-cü il iyulun 10-da "TotalEnergies” və SOCAR Xəzər dənizindəki "Abşeron” qaz-kondensat yatağının işlənməsinin birinci mərhələsi çərçivəsində hasilata başlandığını elan ediblər.

"Abşeron” yatağının işlənməsini "Absheron Petroleum B.V.” Müştərək Əməliyyat Şirkəti həyata keçirir. (JOCAP) SOCAR Abşeron (50%) və TOTAL E&P Absheron (50%) tərəfindən yaradılıb.  Müqavilə 30 il müddətinə imzalanıb. Müqavilə sahəsi 747 kvadrat metrdir. 

Abşeron bloku Bakıdan 100 km aralıda, 500 metr dərinlikdə yerləşir.

 

2019-cu ildə SOCAR və TOTAL şirkəti "Abşeron” yatağında dərinliyi 7411 metr olan "ABD-001” istismar-qiymətləndirmə quyusunun qazılmasını başa çatdırıb.

 

İlkin hesablamalara görə, yatağın ehtiyatları 300 milyard kubmetr qaz və 100 milyon ton kondensat təşkil edir və onun işlənməsi mərhələli şəkildə həyata keçiriləcək.

Birinci mərhələdə hasilatın həcmi ildə 1,5 milyard kubmetr təşkil edəcək. Layihə ən yüksək həddə ildə təxminən 5 milyard kubmetr qaz hasil edə bilər. Yataqdan həmçinin gündəlik təxminən 10 000 barel kondensat hasil ediləcəyi nəzərdə tutulub. 

 

"Abşeron" yatağından çıxan qaz Azərbaycan qaz sisteminə daxil olur. İkinci fazada isə bu qazın xarici şirkət tərəfindən ixrac ediləcəyi də istisna edilmir.