AZAL Bakıdan Milana gündəlik reyslər həyata keçirəcək

“Azərbaycan Hava Yolları” (AZAL) mayın 13-dən etibarən Bakı–Milan–Bakı marşrutu üzrə gündəlik uçuşlara başlayacaq. Bu barədə AZAL prezidenti Samir Rzayev İtaliyanın Azərbaycandakı səfiri Luka Di Canfrançesko ilə görüş zamanı bildirib.

Aprelin 1-dən bu istiqamətdə həftəlik reyslərin sayı artıq altıya çatdırılıb.

Görüşdə tərəflər hava nəqliyyatı sahəsində əməkdaşlığın genişləndirilməsi və yeni imkanların dəyərləndirilməsi məsələlərini müzakirə ediblər. Uçuşların artırılmasının Azərbaycan və İtaliya arasında iqtisadi, turizm və mədəni əlaqələrin inkişafına töhfə verdiyi vurğulanıb.

Səfir Di Canfrançesko 2026-cı ildə İtaliyada keçiriləcək Qış Olimpiya Oyunlarını xatırladaraq, bu dövrdə hava əlaqələrinin əhəmiyyətini xüsusi qeyd edib.

2024-cü ildə AZAL Bakı–Milan–Bakı marşrutu üzrə 252 reys yerinə yetirib və 67 708 sərnişin daşıyıb. 2025-ci ilin ilk üç ayında isə bu istiqamətdə 67 reys həyata keçirilib, 15 236 sərnişin daşınıb.

Tərəflər, həmçinin yeni istiqamətlərin açılması, ortaq təşəbbüslər və regional inteqrasiya imkanları ilə bağlı fikir mübadiləsi aparıblar.

Aytac