Qəbələ qlobal aviasiya xəritəsinin bir hissəsinə çevrilir -Teymur Həsənov

Əbu-Dabi və Qəbələ arasında birbaşa uçuşların açılması Azərbaycanın regionlarının beynəlxalq nəqliyyat və logistika dəhlizlərinə inteqrasiyası baxımından strateji əhəmiyyət daşıyır. Bu fikirləri Heydər Əliyev Beynəlxalq Hava Limanının direktoru Teymur Həsənov reysin açılışı çərçivəsində təşkil olunan media-tur zamanı jurnalistlərə bildirib.

"Bu reys Qəbələnin qlobal aviasiya xəritəsində yerini daha da möhkəmləndirməklə yanaşı, ölkənin şimal-qərb bölgəsinin turizm, investisiya və logistika potensialının artmasına da ciddi töhfə verir", –  o qeyd edib.

"Biz bu marşrutu beynəlxalq hava əlaqələrinin inkişafına yönəlmiş regional strategiyanın bir hissəsi, eyni zamanda Azərbaycanın Avrasiyanın mərkəzində yerləşən dinamik nəqliyyat qovşağı kimi mövqeyini daha da gücləndirəcək genişmiqyaslı inkişaf konsepsiyasının bir elementi kimi qiymətləndiririk", – Həsənov əlavə edib.

Abu Dabiyə reyslər həftədə 3 dəfə – çərşənbə axşamı, cümə axşamı və şənbə günləri yerinə yetiriləcək. Gələcəkdə isə tələbatdan asılı olaraq uçuşların sayının artırılması planlaşdırılır. 

Biletlərin qiyməti 45,99 ABŞ dollarından başlayır.

Qəbələ Hava Limanı 2011-ci ildən fəaliyyət göstərir.

Gülnar Nazimqızı