Bakı və Kabil "Lazurit" dəhlizinin genişləndirilməsini müzakirə edib

Azərbaycan Baş naziri Əli Əsadov və Əfqanıstanın iqtisadi məsələlər üzrə baş nazirinin müavini Əbdül Qani Beradar iyulun 2-də keçirilən görüşdə "Lazurit" nəqliyyat dəhlizinin inkişafını müzakirə ediblər.

Əfqanıstan iqtisadiyyat nazirinin müavini bu barədə “X” sosial şəbəkəsində paylaşım edib. Məlumata görə, Azərbaycan hökuməti Əfqanıstanla ticarət dövriyyəsini, xüsusilə də ixrac və idxal həcmlərini artırmağa hazır olduğunu bildirib.

"Lazurit" dəhlizi Əfqanıstanın qurudulmuş meyvələr, dərman bitkiləri və faydalı qazıntılar kimi əsas məhsullarını xarici bazarlara çıxarmaq üçün perspektivli marşrut hesab olunur.

Əfqanıstan nümayəndə heyəti İqtisadi Əməkdaşlıq Təşkilatının (ECO) 17-ci sammitində iştirak etmək üçün Bakıya səfər edib.