Azərbaycan ötən illə müqayisədə yeyinti məhsullarının idxalını artırıb

Azərbaycan 2025-cü ilin ilk yarısında ümumi dəyəri 1,28 milyard ABŞ dolları olan yeyinti məhsulları idxal edib ki, bu da ötən ilin eyni dövrü ilə müqayisədə 15 milyon dollar çoxdur. Bu barədə Dövlət Gömrük Komitəsinin statistikasında qeyd olunub.

Hesabat dövründə ölkəyə ən çox idxal edilən məhsullar arasında 602,2 min ton həcmində buğda (130,7 milyon ABŞ dolları) və 239,3 min ton tərəvəz və meyvə (178,8 milyon ABŞ dolları) üstünlük təşkil edib.

Digər əsas məhsullar arasında 22,4 min ton ət (47,2 milyon dollar), 8 min ton süd və qaymaq (13,1 milyon dollar), 13,6 min ton kərə yağı və digər süd yağları (94,6 milyon dollar), 7,1 min ton çay (42,9 milyon dollar), 30,7 min ton düyü (29 milyon dollar), 36,9 min ton qarğıdalı (13,9 milyon dollar) yer alıb.

Ümumilikdə yeyinti məhsullarının idxalı Azərbaycanın ümumi idxal strukturunda 11,1% paya malik olub.

Gülnar Nazimqızı