Qeyri neft-qaz sektorundan daxilolmalar 2025-in ilk yarısında 2,3% artıb

Azərbaycanda 2025-ci ilin yanvar-iyun aylarında dövlət büdcəsinin qeyri neft-qaz sektoru üzrə daxilolmaları 10 milyard 277,3 milyon manat təşkil edib. Bu, ötən ilin müvafiq dövrü ilə müqayisədə 2,3% və ya 232,3 milyon manat çoxdur. Bu barədə Maliyyə Nazirliyindən bildirilib. 

Qeyri neft-qaz sektorundan daxilolmalar ümumi büdcə gəlirlərinin 51,9%-ni təşkil edib. Göstərici proqnozla müqayisədə 4,7% və ya 457,0 milyon manat artıq olub.

Dövlət büdcəsinə daxilolmaların əsas hissəsini – 62,4%-ni və ya 6 milyard 417,6 milyon manatı vergi orqanları təmin edib.

Gömrük orqanlarının payı 30,1% və ya 3 milyard 91,1 milyon manat olub.

Büdcədən maliyyələşən təşkilatların ödənişli xidmətlərindən daxilolmalar 312,2 milyon manat (3,0%), sair daxilolmalar 434,5 milyon manat (4,3%), dövlət əmlakının icarəyə verilməsindən gəlirlər isə 21,9 milyon manat (0,2%) təşkil edib.

Proqnozla müqayisədə vergi orqanları üzrə daxilolmalar 3,5% (218,6 milyon manat), gömrük orqanları üzrə isə 0,1% (4,1 milyon manat) artıq icra olunub. Digər mənbələrdən və əmlak icarəsindən daxilolmalar 3,3 dəfə artaraq 319,2 milyon manat təşkil edib.

Ödənişli xidmətlər üzrə daxilolmalar isə 21,4% və ya 84,9 milyon manat az olub.

Gülnar Nazimqızı