Azərbaycan qazının Suriyaya ixracı avqustun 2-də başlayacaq

Azərbaycan təbii qazının Türkiyə üzərindən Suriyaya ixracına avqustun 2-də start veriləcək. Bu barədə Türkiyənin energetika və təbii sərvətlər naziri Alparslan Bayraktar məlumat verib.

“Şənbə günü, avqustun 2-də Azərbaycan qazını Kils vasitəsilə Hələbə ixrac etməyə başlayacağıq”, – o, Anadolu agentliyinə bildirib.

İlkin mərhələdə Suriyaya illik 1,2 milyard kubmetr qaz ixrac olunacaq. Qaz əsasən Hələb və Homs vilayətlərindəki istilik elektrik stansiyalarında istifadə ediləcək.

Layihənin məqsədi müharibədən zərər çəkmiş enerji infrastrukturunun bərpasına dəstək verməkdir.

Qaz Kils şəhərindən Suriyanın sərhədinə qədər çəkilmiş boru kəməri vasitəsilə ötürüləcək. Türkiyə tərəfi boru kəmərinin tikintisini, Suriya isə texniki qoşulmaları başa çatdırıb.

N.Təbrizli